- BIBÍ PATU XI NA JA LEGA PA TELIF -

 


Bibí sa wan patu d'ambô ku tassa losso losso, y na ja lega pa zugan bubu ka tyal déf, ilai y na jata meme d'ogof, y ja da petú ku bôbô, fomôzó. Wan djia wan pay, bê patu ndola ndola say séê bingongo têl pa bijo tadji, sé bibí falí: bo ten ja ngongo temu, ma wan budu pa bo tyamu pa se sa joxi fê za pa bo temu. Tá pe say jendé xí sê bôjô dê m'djila betu; sêhê bê gá fa ta pê joxi bibi fal.

Tadaxí se jua budu gay, se tyá bibí say, waya ta ké tyali sé dé ado, pa ké nontuse fá bibí sangwé da ado, da ôgue

Bibí

levxí sa tôl. Sé budu pesay, vent'a se bada jonta jan galafan tómbô djingwé sé kabela y se na sa ja feha feha xif.

Ta xiô tômbô sê bê se n'da tope, ku sula pa toje pé ne feguela; y se na sa pufiaf y ne pufa wan bojo tempu gávxi, batoja ku pôw pe bôjodantu pada padji tosay. Panamsedji bé n'gutudu lipeveyu paké y fe jonexi ngwé danadu já fê.

Fo dêxí sé n'gutudu sê fa bibí na sa putu d'ôgôf, y sa wan patu plepal sê zugan n'gwê ntan ja da pixgú télif, se ye se non jaba pé.

F I N

 

   

Este cuento está incluido en el libro " Cuentos Annoboneses de Guinea Ecuatorial" pag.(163), dentro de los cuentos en versiones en lengua Ambu, cuyos Autores son:

Jacint Creus -  Mª. Antònia Brunat.